الأنطوائي الأجتماعي
لو انت بتحب تخرج وفنفس الوقت بتحتاج وقت خاص ليك لوحدك يبقي انت واحد مننا
تعالي اقولك قصة :
يوم الخميس قعدت لوحدي باقرأ وأكتب وأخلص شغلي . ع الساعة 10 بالليل جاتني رسالة من صاحبي بيقول لي بتعمل ايه؟ عشان كان عايز يخرج فرديت عليه وقلتله ولا حاجة وانت ؟
مردش عليّ وفي نفس الوقت كنت عايز انزل برضو، وقعدت افكر اني أكلمه عشان نشوف هنعمل ايه ؟ لكن في نفس الوقت كنت عايز اقعد في البيت وأكمل قراءة الكتاب اللي ف أيدي عشان انام بدري, فمكلمتوش !
عدت ربع ساعة وكلمته !الموضوع أخد مني نص ساعة كاملة تفكير عشان اسيب الكتاب اللي بقراه وأمسك التليفون واكلمه عشان أعرف هيعمل ايه ؟
وبدلا ما اقضي الليلة في البيت نزلت الساعة 10 ونص عشان أخرج معاه. ولما نزلت أكلنا وشربنا وقضيناها للصباح الباكر وكنت مبسوط عادي
تاني يوم قعدت ع القهوة خلصت شغلي وروّحت وقعدت آكل لوحدي و وأنا بتفرج علي فيلم . مكلمتش حد . بعتت رسالة لصاحبي بس اتطمن عليه, مكنتش عايز أكلم حد. وكنت مبسوط جدا جدا برضو
بالنسبة لنا، احنا في النص بين الحالتين ، بنتمرجح رايح جاي بينهم.
عارف ان الموضوع محير
وعشان نشيل الحيرة شوية, دي شوية حاجات لازم تعرفها عن الانطوائي الاجتماعي:
1- غالبا بنكون صامتين، لكن دة مش معناه أننا مش عايزين نتكلم .
احنا بنبقي مليانين أفكار عايزين نتكلم عنها, بس بنقول في دماغنا أنها مش مهمة للي قدامنا فبنفضل نسمعهم عشان نعرفهم أكتر وعشان احنا عارفين انهم مبسوطين وهم بيتكلموا.
2- احنا بنفضل المقابلات الفردية عن الخروج في مجموعات, عشان ننبسط أكتر .
3- احنا أسوأ الاشخاص استجابة للمكالمات والرسايل, عشان احنا أوقات مبنبقاش عايزين نتكلم مع أي حد ... خالص
دة مش معناه أننا بنكره الناس أو أننا منزعجين منهم, هو مجرد إرهاق من التواصل بس
4-رغم أننا بنحتاج لوقت نختلي فيه بنفسنا إلا أننا بنشعربالوحدة برضو.
5-صعب علينا نخرج من البيت, إلا أننا بنستمتع لما بنخرج
6-.بعد الكلام والهري لمدة طويلة بنحتاج نقعد مع نفسنا نشحن زي الموبايل كدة .
7- حياتنا في دماغنا حتي لو كنا بنتعامل مع العالم عادي .
8- بنتمرجح ما بين الرغبة في الحصول على الاهتمام والملاحظة عشان اشتغلنا كويس، وما بين الفزع من فكرة أن في شخص تاني خد نص دقيقة من الوقت عشان ينتبه لنا.
9-بنتجنن من فكرة اننا بنحب القعدة في البيت وأن اصحابي يزعلوا .
10 - في كذا دايرة صحاب .
11- لو قلنا اننا معجبين بيك أو بحاجة عملتها يبقي دة بجد .. عشان دي مش هتطلع من الشخصية دي بسهولة او عشان يكدب عليك يعني .
12- عادة احنا اقل الاشخاص تكلم في محيطنا. لكن لو احتاج شخص ما دعم شخصي أو نفسي، ممكن نتحرك ونتكلم ونقدم المطلوب مننا بدون مشكلة .
