العمل في الامارات و البحث عن عمل والاقامه والشغل في دبي -

العمل في الامارات
من اكثر المقالات التاريخيه اللي لو انت تايه ومش عارف تروح الامارات ولا متروحش ..ومش عارف تعمل ايه عشان متخسرش فلوسك .. اقرأ البوست دة للاخر

------------------------------------------------------

عشان تشتغل في الامارات بيحصل حاجه من اتنين

1- بيجيلك عروض وانت قاعد في بلدك معزز مكرم وتسافر علي شغل

2- تروح بفيزا سياحه شهر او 3 شهور وتدور انت بنفسك

دليلك الشامل الهجرة إلى قطر 2022 .. الإقامة والعمل والجنسية

-----------------------------------------------------

اولا : نتكلم علي الناس اللي بيجيلها عروض وهي في مصر :

مبدأيا نجاوب علي السؤال الذي حير الملاييييييييييييين

انا دكتور وجايلي عرض شغل في دبي بمرتب كذا اوافق ولا موافقش ؟
انا مهندس وجايلي عرض شغل في دبي بمرتب كذا اوافق ولا موافقش ؟
.

لما حد يجيله عقد عمل او عرض عمل ومحتار يقبل ولا لأ
لازم يفكر في 3 حاجات :
1- وضعك في مصر
2- متوسط تكاليف المعيشه في المنطقه اللي هتروحها في دبي
3- هدفك او طموحك من السفر

رقم 1 : وضعك في مصر

لو انت اعزب وبتاخد 3000 او 4000 جنيه في مصر
او انت متزوج و بتاخد 6000 او 7000 جنيه في مصر

يعني حياتك في مصر شبه مستقره .. ( مقولتش مستقره بشكل كامل بقول شبه مستقره )
مستورة يعني ف مصر مش بتشحت بالمعني الحرفي

ساعتها لما تحب تطلع برا يبقي تطلع علي حاجه مضمونه وافضل وظـيفيا واجتماعيا من وضعك بتاع مصر
ومينفعش مثلا تسيب المرتب دة عشان تروح تاخد 1000 درهم بس مثلا في دبي !!

6000 ايميل للتقديم عن وظـائف في الامارات

لكن اسف لو انت بتشحت في مصر او بتاخد يادوب 500 جنيه في الشهر وقتها اي مرتب بأي وضع برا مصر هيكون احسن من وضعك اللي في مصر وتقبل بأي عرض يجيلك فورا
.

رقم 2 : متوسط تكاليف المعيشه في المنطقه اللي هتروحها في دبي

لازم مرتبك اللي هتاخدة في الدوله اللي رايحها يكون علي الاقل مغطي الحد الادني لمتوسط تكاليف المعيشه

يعني مثلا مينفعش تقول عايز اعيش في المركز المالي او دبي مارينا او البارشا في دبي ومرتبك 500 درهم بس .. معلش يعني اديني عقلك وامشي انت حافي

هتعيش ازاي بالراتب دة ومتوسط تكاليف المعيشه في دبي عالي جدا جدا جدا مهو اكيد مش هيكفوك مهما عملت

لازم تعرف الحد الادني من متوسط تكاليف المعيشه هناك ودة بتعرفه من موقع https://www.numbeo.com/cost-of-living/ وعلي اساس الحد الادني دة هتعرف تعمل تقييم للراتب المعروض عليك وهل هيكفيك ولا لأ

والمـوقع بيعرفك كل حاجه من اول الاكل والشرب والمواصلات وكل حاجه

رقم 3 : طموحك وهدفك من السفر

لو طموحك هو التحويش وانك تحط القرش علي القرش عشان تهاجر بلد افضل بعد كام سنه وقتها لازم تروح علي مرتب تعرف تحوش منه .. يعني بالبلدي لازم يدفعوا ليك ثمن غربتك اللي هتتغربها

لكن لو طموحك هو انك واخد السفر دة مرحله مبدئيه بس عشان تخرج من مصر وبعد كدة ربنا يفتحها عليك وتترقي يبقي ساعتها هتقدم تنازلات عادي ومش شرط تاخد بدل سكن وبدل مواصلات واوفر تايم وبتاع .. هتقدم تنازلات عشان تعرف تسافر وتاخد خطوة مبدئيه

اما بقي لو طموحك الهروب من مصر وخلاص يبقي ساعتها اقبل بأي حاجه حتي لو عرضوا عليك انك تشتغل بدون مقابل .. ما انت عايز تهرب وخلاص بقي
.

دة الملخص باختصار .. احسب حسبتك بناءا علي ال 3 عوامل دول وحدد قرارك بنفسك بدون الاستعانه بأي حد وطبعا استخير في الاول والاخر

بالمناسبه ابقي شوف العرض اللي معروض عليك عليهم تذكره الطيران والفيزا ولا لأ .. لان في اوقات كتير شركات بتدفعلك تذكره الطيران كمان

---------------------------------------------------------------
ثانيا : الطريقه التانيه انك تروح بفيزا سياحه شهر او 3 شهور وتدور انت براحتك

مبدأيا عشان تلاقي شغل بالطريقه دي لازم يكون عندك حاجتين :

1- انجلش انجلش انجلش انجلش انجلش انجلش .. وحياه اللي خلفوك يا خلف لترفع راسي لفوووووج وتكون عارف انجللللللللللللللللللليش

2- يكون معاك 50 الف جنيه فأكثر ( شاكب راكب ) عشان تعرف تعمل الرحله دي ...

ممعاكش الحاجتين دول يبقي عدي البوست ولا كأنك شوفته ومتفكرش ف دبي اصلا

نقول تاني عشان الناس اللي هتنصب عليك وتعملك البحر طحينه وتقولك روح دور علي شغل حتي لو ممعاكش غير حق تذكرة الذهاب بس .. وفي الاخر تنام في الجوامع وتكتـب بوست علي صفحه الجاليه المصريه في دبي تشحت حق تذكره العودة

معلش انا صريح لدرجه الوقاحه بس عشان عارف النصب والضحك علي عقول الناس بأسم النصيب والرزق وفي الاخر الناس تلبس في الحيط

معاك انجلش كويس و معاك 50 او 60 الف جنيه عشان تعمل الطلعه دي و تروح تدور علي شغل اوك روح وربنا يرزقك .. لكن لو ممعاكش المبلغ دة ولا اللغه دي متروحش ولا تفكر اساسا في الامارات

في ناس هتيجي تحت في الكومنتات تقولي كلامك كلللللللللله غلط ! انا ابن عم جوز خاله امي راح وهو ابيض مييييييييييييح ومكانش حتي بيعرف يقرأ ويكـتب ولقي شغل في الامارات ..

اوك ابقي خلي ابن عم جوز خاله امك بقي هو اللي يجبلك الشغل ويشغلك وانت ابيض ميح ..

انا قولت النصيحه وخلاص .. عايز تسمع لكلام حد تاني اتفضل روحله انا مليش فيه ..

--------------------------------------------------------------
طيب انا معايا المبلغ دة ومعايا انجلش وكله تمام اطلع الفيزا ازاي واسافر ؟؟

1- تطلع الفيزا من اي شركه سياحه في وسط البلد وبتاخدها بعد كام يوم

وخلي بالك الرينج بتاعها من 90 دولار ل 150 دولار علي حسب المدة بتاعتها عشان ميتنصبش عليك

2- تطلع الفيزا مع الطيران الاماراتي سواء فلاي دبي او العربيه او الاتحاد او الاماراتيه

* بس شرط تحجز معاهم ذهاب وعودة

* فلاي دبي بتطلب منك تأمين مسترد لما ترجع وبيكون حوالي 7000 جنيه

* فلاي دبي او العربيه ( مش فاكر مين فيهم بالظبط ) بتعفيك من التأمين في حاله لو معاك فيزا امريكا او كندا او شنجن في اخر 5 سنين

* الاتحاد بتنزلك ترانزيت ابو ظبي وبتاخدلك باص لدبي

* فلاي دبي اللي بتروح من برج العرب بتنزل في تيرمينال 2 في مطار دبي ودي خازوق كبير لانك هتضطر تاخد تاكسي علي ما تروح لاقرب محطه مترو

* العربيه بتوديك الشارقه .. المهم ما علينا .. لما بتوصل بالسلامه لازم تشتري شريحه موبايل عشان يبقي معاك رقم اماراتي تكـتبه في ال CV بتاعك وهتلاقي اتصالات هناك مغرقه الدنيا ..

* حمل تطبيق " وجهتي " من اي مكان فيه free wifi عشان تعرف تروح الاماكن ازاي بأرخص الطرق ومن غير ما تتوه او تدفع فلوس كتير
-----------------------------------------------------------------
طيب اديني وصلت و اتغديت واستريحت وشربت الشاي كمان

اعمل ايه بقي عشان ادور علي شغل ؟؟

اولا انسب وقت عشان تدور علي شغل هناك من اكتوبر ل ابريل ..

ليه مينفعش تدور علي شغل في الصيف هناك ؟؟

حضرتك الصيف هناك زي جهنم بالظبط .. الناس اصلا في الصيف بتخش المولات بدل ما تسيح في الحر وانت راجل جاي تدور علي شغل يعني هتلف علي رجلك وهتروح وتيجي وتنزل وتطلع فروح فالشتاء والخريف احسن بكتير

ثانيا : لازم تكون جاي وانت معاك حاجتين ال CV بتاعك و شهادتك متوثقه :

1- ال CV بتاعك لازم يكون اكثر من ورقه .. السي في الورقه الواحدة دة تعمله قرطاس لب وتشتغل بيه في مصر لكن في الخليج عموما بيحبوا العنطزه الفارغه ولازم تملي عينهم بال CV بتاعك

ودة لينك مقال شامل من خبراء الاقتصاد في الامارات عن الاخطاء اللي بيشوفوها في ال CV بتاعه الناس اللي بتيجي تبحث عن عمل هيفيدك جدا عشان تعرف تظبط ال CV
من هنا

2- شهادتك الجامعيه دي بتوثقها من امين الجامعه ومكـتب توثيق الخارجيه والملحق الثقافي لسفاره الامارات أو وزاره الخارجيه الاماراتيه لما توصل

ثالثا : في 3 طرق عشان تلاقي شغل وانت في الامارات :

1- طريقه تقليديه : انك تطبع ال CV بتاعك وتنزل تلف علي رجلك وتسلمه يدا بيد للشركات والمؤسسات المعروفه في تخصصك

2- طريقه شبه تقليديه : انك بتروح تحضر مؤتمرات مـجانيه عن التوظـيف والشغل من وانت هناك في الامارات اللي بيسموها open day بيعملوها الشركات الكبيره وغالبا بتبقي مـجانيه

3- طريقه حديثه : انك تراسل الشركات والمؤسسات علي الميل من خلال مواقع التوظيـف وتبعتلهم ايميلات بالسي في بتاعك أو تعمل اعلان في جرايد التوظيـف هناك

* موضوع الاعلان في جرايد التوظيـف زي جريده الخليج أو Gulf News هناك مثلا موضوع مش مُجدي وبتكون شركات متوسطه اللي هياخدوك من الجرايد دي وهيمصوا دمك علي الفاضي

الاعلان بيتكلف في اليوم لو في الخليج 15 درهم يعني 75 جنيه يوميا .. لو في Gulf في اليوم 65 درهم يعني 325 جنيه يوميا

( لو معاك فائض فلوس اعمله .. ممعاكش بلاش منه )

وهنا هجبلكم جميع المواقع والصفحات اللي بتعرض شغل في الامارات :

https://www.linkedin.com/

https://www.indeed.ae/

https://www.bayt.com/en/uae/

https://uae.tanqeeb.com/ar

http://ae.waseet.net/ar/site/dubai/jobs

http://shoghlanty.com/search.aspx?country=الإمارات

https://getthat.com/jobs

https://www.gulftalent.com/uae/jobs/c...

http://buzzon.khaleejtimes.com/ad-cat...

https://www.naukrigulf.com/jobs-in-dubai

http://www.edarabia.com/jobs/dubai/

المـوقع اللي جاي ده هتلاقي فيه فرص عمل وكمان مشهور جدا انك تلاقي فيه مكان تسكن فيه بالمواصفات والسعر اللي انت عايزه
https://dubai.dubizzle.com/

----------------------------------------------------------
طيب يا سيدي انا خلاص عرفت اجيب شغل اعمل ايه عشان اخد اقامه ؟؟

قبل ما اقولك انواع الاقامات هناك لازم تاخد بالك من حاجتين :

الحاجه الاولي : الشغلانه بتاعتك دي سوقها عامل ازاي في الامارات .. بمعني .. معدل الرواتب بتاعها قد ايه في الامارات .. ليه لازم تعرف ؟؟

عشان اصحاب العمل هناك ميضحكوش عليك ويقرطسوك .. يكون مثلا معدل الرواتب بتاع الشغلانه الفلانيه اللي هتشتغلها 10 الاف درهم مثلا وصاحب العمل يقولك هتاخد 5000 درهم بس .. كدة بيقرطسك وبيستغفلك .. فلازم تعرف الشغلانه سوقها عامل ازاي قبل ما تتعاقد

الحاجه التانيه : تاخد بالك كويس من شروط ال offer letter ودي اكثر حاجه الناس بتلبس خوازيق فيها انها بتمضي علي العقد من غير ما تقرأ شروطه كويس .
---------------------------------------------------------------------------

الحته اللي جايه دي وضحها المستشار القانونى : محمد الجمل يعني كلام قانوني 100 %
.

اولا : الشركات بتعمل حاجه اسمها فتره التجربه ( عامل تحت التجربه ) بتبقي 6 شهور وبتكون موجودة في العقد ان من حق الشركه تمشيك من غير ما تدفعلك اي مستحقات و بدون اسباب ..

قانونا قانونا قانونا وعلي الورق .. طول ما انت في فتره التجربه ملكش اي حق انك تسيب الشغل وتمشي لكن صاحب العمل بس هو اللي ليه الحق انه يمشيك بدون اي خساره عليه

لكن لو تقدر تخلي الشركه يضيفوا بند انك انت كمان من حقك انك تمشي في اي وقت في اثناء فتره الاختبار دي عشان لو جالك شركه احسن او معجبكش الشغل معاهم يكون احسن ..

ثانيا : العقود في الامارات نوعين :

1- عقد Limited : بيكون عقد سنتين او تلاته او اربع سنين كحد اقصي وبيتم تجديده بعد كدة ..

مميزاته :

* لو صاحب العمل حب يمشيك قبل انتهاء التعاقد و بعد فتره التجربه هيدفعلك مرتب 3 شهور كاملين وبيسموها في القانون تعويض عن الفصل التعسفي

عيوبه :

* لو انت اللي حبيت تمشي قبل انتهاء التعاقد وبعد فتره التجربه لازم تدفعلهم نص مرتب 3 شهور

* العقد بيكون فترته مقفوله يعني لو المدة خلصت ومش عايزين يجددولك مش هيجددولك

2- عقد Unlimited : بيكون مفتوح يعني ملوش مدة محدده ..

مميزاته :

* ممكن تستقيل في اي وقت لو حبيت تسيبهم وتروح علي شركه تانيه لكن لازم تدي اسباب قانونيه ولازم تخطر صاحب العمل كتابيا ( بالكتابه ) قبل ما تمشي بمدة اخطار 30 يوم كاملا .. يعني قبل ما تمشي من الشغل بشهر كامل لازم تقولهم وتقعد الشهر كامل دة عندهم وبعدين تمشي ..

عيوبه :
* لو صاحب العمل حب يمشيك قبل انتهاء المدة هيدفعلك مرتب شهر واحد

لازم تكون متفق معاهم في العقد علي البدلات والاوفر تايم .. المفروض ان عدد ساعات العمل في الامارات 48 ساعه في الاسبوع .. اكثر من كدة لازم تاخد اوفر تايم ..

والاوفر تايم بيكون 20 % علي سعر الساعه العاديه ف ايام الشغل العاديه او 50 % في ايام الاجازات

كمان لازم تتفق معاهم علي الاجازات .. الاجازة غالبا اما 22 يوم عمل او 30 يوم في المطلق .. وشركات كتير بتدفعلك تذكره الطيران بتاعه الاجازة كل سنه

باختصار يعني انك تخليك واعي ومصحصح وقت التعاقد متخليهمش يقرطسوك
-------------------------------------------------------------------
اسكن فين في الاماااااااااااااااااااااااااااااارات ؟؟

طبعا كله هيقولك ادخل علي دوبزل وبتاع .. ماشي ماشي دة شئ مفروغ منه بس دة كلام فض مجالس.. انا هقولك هنا بقي الكلام اللي يجيب الناهيه

القصيص النهده و الكرامة اسعارهم معقولة

المركز المالى غالى لانه منطقة ارقى و فى الشيخ زايد و قريبة من نص البلد كذلك البرشا مش رخيصة ...

بس الغالبية بتسكن فى الشارقة على الحدود مع دبى عشان ارخص من دبى و ناس كتير بتسكن فى المدينة العالمية و دى بعيد شوية

السكن فى دبى مشترك ماحدش يقدر يسكن لوحده الا لو فعلا بيقبض كويس
الغرفة ممكن يسكن فيها اتنين او تلاتة او عشرة
و كل ما يزيد العدد يقل السعر

ممكن تاخد غرفة فى شقة فى الشارقة ب 2000 درهم مثلا و 2500 لو بحمام خاص

الستوديو ممكن سعره يبقى 3300 و طالع لو على الحدود و ممكن يزيد

الدفع بشيكات مقدمة 12 او 4 او 2 شيكات
و كل ما يزيد عدد الشيكات يزيد السعر
ده غير شامل الخدمات زى المياة و الكهربا و الغاز و النت

ايه موضوع الشيكات دة ياعم احمد !!!!!!!!!

ركز يا معلم شويه معايا في النقطه دي

الرواتب بتنزل فى حسابك فى البنك ... مافيش قبض مانوال .. يا بتروح تفتح حساب او شركتك بتفتح لك ... و حساب المرتب بيكون جارى ... بيطلع معاه دفتر شيكات مـجانى ...

بتروح حضرتك تاجر شقة او ستوديو مثلا
بتكـتب العقد و بيكون منصوص فيه ان الايجار بيدفع شهرى او ربع سنوى او نصف سنوى مثلا

لو شهرى يبقى بتكتـب ١٢ شيك كل واحد بتاريخ استحقاق اول كل شهر من شهور السنة ... يوم ٥ مثلا تكون الرواتب نزلت

لو ربع سنوى هتكـتب اربع شيكات بتواريخ مارس و يونيو و سبتمبر و ديسمبر
لو نصف سنوى يبقى يناير و يوليو مثلا ... او حسب تاريخ توقيع العقد
الشيكات دى بتتسلم مع العقد
و كل ما تزيد الشيكات كل ما يزيد السعر
.

يعنى لو الشقة فرضا ايجارها ١٢ الف درهم فى السنة على شيكين
لو طلبت انهم يبقوا اربع شيكات يبقى الايجار هيبقى ١٣ فى السنة
و يزيد اكتر لو بقوا ١٢ شيك يبقى مثلا ١٤ الف حسب الاتفاق

زى ما قولت بيبقى غالبا السكن مشاركة .... و قليل اللى بياخد استوديو او شقة لوحده ...

فى ناس كمان بتاجر بالسرير و تلاقى اتنين ماجرين سرير واحد عشان يوفروا واحد مثلا شغال شيفت الصبح و واحد بالليل ... عشان كده متستغربش لما تسمع ان الفلبينيين و الهنود بيرضوا بمرتبات ١٥٠٠ درهم واقل كمان ..
---------------------------------------------------------
في انواع اقامات كتير في دبي منها اقامه شركه واقامه خدم وكذا نوع تاني

بس لازم اوضح نقطه بيتنصب علي المصريين بيها .... اقامة شركة مكلفة جدا ...

و اللى بيعمل الموضوع ده بيبيع فيز حرة و تمنها بيوصل لعشرين الف درهم و اكتر و مدتها سنتين و مالهاش لازمة لانك مابتشتغلش بيها قانونى ..

ولو لقيت شغل لازم يعمل لك نقل كفالة على الشركة الجديدة ..

عشان تشتغل دكتور في دبي الموضوع معقد شويه .. ركز معايا شويه

اي شغل طبي ( بشري - بيطري - اسنان ) في الامارات محتاج ترخيص ( باستثناء الميديكال ريب )

وكل امارة لها ترخيص .. مثلا أبو ظبي والعين ليهم ترخيص ودبي ليها ترخيص والشارقة وعجمان وام القوين والفجيرة ليهم ترخيص ..

أسهل ترخيص في دبي لأنه أون لاين .. هتعمل ايه بقي ؟؟ ركز معايا

أولاً : هتدخل على موقع هيئة الصحة في دبي ، وتعمل حساب جديد

هيطلبوا منك اللي جاي ( بتختلف حسب التخصص ) :

1- خبرة سنتين
2- شهادة حسن سيرة وسلوك من وزارة الصحة في بلدك
3- شهادة مزاولة من بلدك
4- شهاداتك الجامعية مع درجاتك وال GPA غير مصدق،
5- كشف نتائج الثانوية العامة غير مصدق
6- صور شخصية، وصور الباسبور وشويه ورق تاني

ثانيا : المـوقع هيتواصل معاك وهيراجع معاك كل خطوة بكل الاوراق عشان لو في ورق ناقص

ثالثا : هتقدم علي امتحان اسمه برومترك، ممكن تمتحنه في بلدك بالمناسبه لان الامتحان دة مسؤلة عنه مؤسسة أمريكية أو كندية وموجود ليهم فروع في كل أنحاء العالم، وتقدر تقدم علي الامتحان في بلدك بكل سهولة

رابعا : بعد ما تعدي في الامتحان يدوك شهادة عشان تقدمها للمستشفيات أو المراكز الطبية أو الصيدليات وغيرها للحصول على الوظـيفة..

في طبعا اجراءات تانيه بتختلف حسب التخصص .. لازم تراجعها مع المؤسسه الطبيه اللي هتشتغل فيها الاول