هنتكلم النهاردة عن مشكلة ترتيب الأولويات
كل واحد فينا بيكون أدامه أهداف كتير نفسه يحققها لكن من كترهم بيحس بالتشتت
أبسط مثال على ده ناس بتيجي تقول احنا مش عارفين نوازن بين الكورسات الأونلاين وبين الشغل والدراسة
وللأسف الأغلب بيدخل في دوامة الكسل وتضييع الوقت وبيتفاجيء إن الوقت بيجري وهو معملش أي إنجاز
لما الخطة والأهداف اللي كنت حاططهم لنفسك من سنتين هما نفسهم بتوع السنادي .. يبقى أنت عندك مشكلة
وحلها إنك تعمل اللي هنقولك عليه بالظبط
أولًا: تحدد أهم هدف عايز تحققه
مثال: عايز أبقى بتكلم إنجلش بطلاقة في خلال سنة
ثانيًا: هتقسم الهدف الكبير ده لأهداف صغيرة
مثال: الأول هنمي نفسي في مهارة القراءة وبعدها الاستماع ثم الكتابة والتحدث .. وهكذا
أو في خلال أول كام شهر هوصل لمستوى متوسط وبعدها فوق المتوسط .. وهكذا
ثالثًا: هتحدد وقت نهائي (ديدلاين) لتنفيذ كل مهمة صغيرة
ياريت يكون وقت تنفيذ المهمة ده معقول، ميكونش بالزيادة أوي فـ تسرح .. وميكونش على الأد أوي ف أما متلحقش تنفذ المهمة المطلوبة فيه وتُحبط
مثال: هذاكر نص ساعة أو ساعة كل يوم لمدة 3 شهور هسمع فيهم عدد معين من الفيديوهات بالإنجلش
طب إيه اللي يخليك تلتزم بالأهداف دي وتكملها للآخر ومتكسلش وتننتقل على هدف جديد؟
رابعًا: حماس البداية
بلاش تعمل كل حاجة مع بعض لمجرد إنك متحمس تبدأ
مثال: لو أنت عامل جدول نص مذاكرة ساعة يوميًا يبقى التزم بيه من الأول للآخر أحسن ما تاخدك الحماسة في الأول وترجع تكسل
خاصة إن اللغة محتاجة استمرارية مينفعش تذاكر كل الإنجلش في أول يومين وتقعد باقي الشهر فاضي .. أكيد هتنساها
خامسًا: رتب أولوياتك من الأهم فالمهم فالأقل أهمية فغير المهم
مثال: مذاكرة الامتحان اللي معاده بكرة .. أهم من الكورس الأونلاين
ماتجيش ليلة الامتحان تفتح الكورس الأونلاين يعني! .. ماهو قدامك طول السنة
ومذاكرة الكورسات الأونلاين أهم من تضييع الوقت على الفاضي على الفيس
سادسًا: انسى الأسئلة الوجودية
مثال: أثناء تنفيذ هدفك اليومي .. ولع في موبايلك .. انسى إن عندكم تلاجة .. انسى إنك ليك قرايب مكلمتهمش بقالك قرون
سابعًا: خليك قاسي مع نفسك
النفس البشرية قائمة على مبدأ الثواب والعقاب
مثال: لو قصرت في شغلك، هيتخصم منك فلوس .. ولو اشتغلت كويس .. هتاخد حوافز
يبقى بالمثل لو قصرت في عمل المهمة المطلوبة منك في مذاكرة الإنجلش هتعاقب نفسك، ولو أنجزت المطلوب كافيء نفسك بحاجة بتحبها
بالمختصر
لما تيجي تقول: أنا ماعنديش وقت
حاول تسأل نفسك .. كم ساعة بتقضيها على الفيس؟ .. في المواصلات؟ .. في الكلام في التليفون؟
كتابة
