قصة نجاح شركه نسكافية
كتـبت / سهيلة اشرف العمروسى
من ٩٢ سنه رئيس مجلس ادارة شركة نسلا السويسرية فى الوقت دا كان قاعد ف أمان الله، لقى صاحب قديم ليه بيقوله ان بعد ما أسعار البن البرازيلى قَلت هو عنده شغل مهم ليه، وهو انهم يلاقوا فكرة ازاى يحافظوا على الفائض من البن البرازيلى السنوى ويقدروا يتصرفوا فى مخزون القهوة اللى موجود فى المخازن.
وانضم وقتها دكتور كبير لفريق العمل عشان يساعد الباحثين ويلاقوا حل سريع، وطبعا قعدوا يدوروا ويبحثوا وينجحوا ويفشلوا، وموقفوش لحد مانجحوا أخيرا ف انهم وصلوا لفكرة تحويل القهوة لمكعب صغير عشان يقدروا يبيعوه للعملاء بعدين، وكمان استخدموا قدراتهم فى صنع اللبن المجفف عشان يوفروا على المزارعين تعبهم الكبير.
ووقتها الدكتور دا استخدم خبرته فى انتاج مسحوق قهوة سريع الذوبان وقدمه لمجلس ادارة نسلا التنفيذى والمديرين التقنيين، كعينات من القهوة قابلة للذوبان، وبعد ما اتجربت ٨ سنين أعلنت الشركة فى سويسرا قهوة نسكافية اللى أول ماتحطها ف الماية تدوب بسرعه وريحتها تطلع عشان تخليك رايق، كان هدف الشركة انها تحولها بودرة وتفضل محتفظة بطعمها الأصلى وبريحتها الجامده آخر حاجة.
وبعد ما نسكافيه دخلت عالم القهوه، بدأت فى نفس السنه تعمل خط انتاج واسع، لمعالجة وتصنيع حبوب القهوه المجففه، لإنتاج نسكافيه فى مصانعها فى سويسرا.
وفى سنة ١٩٣٩ أحب أقولك عزيزى محب النسكافيه، ان ف الوقت دا شركة نسكافيه رسميا قدرت تاخد علامتها التجاريه، واتشهرت فى الولايات المتحده الامريكيه،وبعدها بسنه نسكافية بقت موجوده ف أكتر من 30دوله!
ودلوقتى هقولك قد ايه شركه نسكافيه كانت ذكيه وقدرت تستغل الحرب العالميه التانيه لصالحها، قدرت انها تضمن وجودها فى وجبات الجنود الامريكيه وقدمت لهم قهوه سريعة الذوبان ولذيذه، وبكدا انضم ليها فئه جديده من العملاء.
ولما فكروا ف الصلاحيه، نسكافيه بقى بيقعد أكتر من القهوه، وأرباحه زادت للضعف خلال فترة الحرب دى، ودا خلاهم يفتحوا اكتر من فرع ف أماكن مختلف.
نسكافيه قدرت تستغل احداث ومسابقات عالميه ف انها تسوق لنفسها، نسكافية وصلت لجبل ايفريست، المتسلقين اللي حطموا الرقم القياسى لما طلعوا على الجبل صوروا علبة نسكافيه فاضيه فوق الجبل.
وعلشان نسكافيه بتحب الكرياتيفتي وبتحب تواكب العصر والتتطور اللى بيحصل، قعدوا يفكروا كل سنه ازاي يخدموا احتياجات عملائهم وازاي يطوروا من القهوه عشان تحتفظ بطعمها اكتر وتمتع العملاء بتوعها، لحد ماوصلوا انهم يستبدلوا العلب الصفيح بعلب زجاجيه عشان تحتفظ بالطعم اكتر واكتر، وابتكروا منتج جديد سموه نسكافيه جولد.
واللي بيثبت ذكاء شركه نسلا فى الخطه التسويقيه بتاعتها، انها حبت توصل لليابان وتحبب الشعب الياباني ف المنتج بتاعها بعد ما كان المشروب الرئيسى هناك هو الشاى.
الشركه عينت باحثه هناك تدرس ثقافه الشعب الياباني اللى توصلت فيها ان الشاي عندهم جزء من الثقافه وعرفت كمان ان الشعب مش بيحب القهوه خالص، وعشان نسلا تقدر تكسب الزبون بدأت تمهد وتفكر لحد مادخلت القهوه فى صنع الحلويات لحد مابقى الشعب الياباني من مدمنين القهوه، واليابان بقت تالت دوله مستورده لقهوه نسلا.
عزيزى محب النسكافيه، نسكافيه هدفها انها تشغلك وقتك وتاخد قلبك وعقلك، ودا من ضمن أسباب نجاح نسكافيه اللى هختصرهم دلوقت:
١- انهم فى البدايه فكروا فى الأزمه وانتجوا منتج مناسب ليهم بعد مابحثوا وجربوا كتير.
٢- لولا انهم اهتموا بالتجديد والتطوير فى فتره الستينات والسبعينات كانت شركه نسكافيه انتهت من زمان.
٣-أهم حاجه انك بتلاقيهم ف كل مكان حواليك، فى الجامعه فيه نسكافيه، علي الطريق اعلاناتهم مغرقه الدنيا، فتحت الفيس هتلاقي نسكافية، فتحت الدولاب هتلاقى نسكافيه وهو دا اللى ناقص بقى بصراحه.
٤- انهم بيعرفوا يبحثوا كويس اوي ويعرفوا العميل بيحب ايه وتعمله، نسكافية عملت ايس كوفي الغلابه فى الصيف ونسكافيه بنكة الفانيليا والكارميل والشيكولاته، ومنها النسكافيه الكلاسيك والجولد عشان تناسب ذوقك واحتياجاتك طول الوقت.
وطبعا بتسعي تكون جمبك ف كل وقت، وقت الشغل والمذاكره.
ودا بناء علي مبدأها الجامد
It is All starts with Nescafe
نسكافيه قدرت تدرس الجمهور بتاعها وتخدم احتياجتهم طول الوقت، وشافت السوق ناقص ايه وهي كملته، ديما كانت بتفكر ف البيزنس بتاعها وازاي تطوره وقدرت تدرس ازاي توصل شغلها العظيم لقلب العميل علي طول، عشان كدا هى قدرت تكمل ف السوق وهى مبسوطه وحاطه رجل على رجل.
