الموازنة بين الحياة الدراسية بما فيها من مذاكرة و إلتزام و حضور و امتحانات و درجات و تقديرات الكويسة , و بين الحياة الاجتماعية من ممارسة الرياضة , الإشتراك فى أنشطة , الخروج و الصحاب و الهوايات ; موازنة ناس كتيرة شايفاها شبه مستحيلة , و كتير مننا بيفشل يحققها أو بيفشل يستمر فى تحقيقها على طول مع أن الموضوع أسهل و أبسط من كده. أقرا الخطوات الجاية و أنعرف على بعض الأفكار اللى ممكن تساعدك تحققها بكل سهولة.
إزاى أوازن بين الدراسة و الحياة الاجتماعية؟
1-حدد أهدافك
لازم تبقى عارف أنت عايز تحقق ايه. عايز مثلا تقديرات معينة , ميدلايات فى رياضة ما , تاخد كورس , تتعلم حرفة … أيا كان اللى انت عايزه لازم تبقى عارفه و محدد هتعمله امتى و إزاى.
2-رتب أولوياتك
بعد ما تعرف أنت عايز تحقق ايه بالضبط , ابدأ رتب أهدافك على حسب درجة أهميتها بالنسبة لك لأن ده هيحدد بعد كده طريقة تعاملك مع كل هدف أو حاجة لوحدها إزاى. مثلا لو أنت الرياضة عندك أهم من الهواية يبقى من الطبيعى إن لو الاتنين اتعارضوا مع بعض هتفضل انك تمارس الرياضة عن الهواية.
3-خليك منظم
أهم حاجة فى الموازنة دى كلها النظام. هات نوتة و نتيجة (أو ممكن تستخدم الموبايل) و أكتب كل أهدافك و أولوياتك اللى حددتهم و خليهم دايما معاك و قدام عينك عشان تحفز نفسك تحققهم. و بعدين أكتب كل اللى وراك بأيامه و مواعيده و دايما برده بص عليه عشان تبقى عارف ايه اللى وراك , و تعرف اوقاتك الفاضية عشان لو حد طلب منك معاد أو انت وراك حاجة تانية مثلا. كمان عشان لو أكتشفت ان فيه حاجتين فى نفس الوقت , تقدر تغيير معاد أو تختار واحد منهم على حسب أولوياتك اللى حددتها قبل كده.
أبعد عن التأجيل و التسويف لأن دول تقريبا ممكن يدمرولك كل اللي بتحاول توازن بينه و إياك تسيب حاجة مهمة “لأخر لحظة” و “أخر يوم” و “قبل المعاد بخمس دقايق”.
4-أتعلم تقول “لأ”
بعد الخطوات التلاتة اللى فوق, لازم تعرف ان فيه حاجات مش هتحضرها و فيه حاجات هتفوتها و فيه خروجات مش هتخرجها ..ليه؟ لأن ترتيب أولوياتك اللى هيحددلك ده و لو أنت فكرت تعمل كل حاجة ,كل حاجة هتبوظ. أعرف كويس انه محدش بياخد كل حاجة و انه فعلا فى إيديك انك تضبط الموازنة, بس لو قدرت تسيطر على نفسك صح. يعنى مثلا لو واحد صاحبك قالك يالا نخرج و أنت تانى يوم عندك امتحان مهم , متقولش خلاص أخرج و لما هرجع أذاكر , لأن غالبا هترجع تعبان و مش فايق تذاكر أو على الأقل هتذاكر وقت أقل من اللى كنت المفروض تذاكره. سيطر على نفسك , خليك قد المسئولية و قول “لأ”!
5-أفتكر دايما انك “طالب”
مهما حققت مناصب فى أنشطة طلابية , بطولات رياضية أو حتى اشتغلت , خليك فاكر ان حاليا انت لسه طالب. يعنى “شفلك الرئيسي هو مذاكرتك”, و على قد ما أهلك ممكن يكونوا بيفرحوا بانجازاتك اللي بتعملها برا الدراسة, مفيش حاجة بتفرحهم قد دراجاتك و تقديراتك و على الناحية التانية لو دراجاتك مكنتش كويسة هيعملوك على أنك فاشل حتى لو أنت محقق نجاحات رهيبة فى أى حاجة تانية. و جايز جدا يبدأوا يحرموك انك تعمل الحاجات التانية عشان تذاكر.
يبقى عشان تتفادى الخلاف ده و عشان تحقق الموازنة بين “شغلك الرئيسي” و أى شغل تانى بطريقة صح. خليك متأكد أن أول أولوياتك هى الدراسة و لازم تديها حقها و تفضلها عن أى حاجة تانية.
“أحضر على قد ما تقدر”: لو أنت لسه فى مدرسة فعادة أنت بتحضر كل الحصص و الأيام الدراسية و الحضور بالنسبالك مش أزمة. اما لو انت طالب جامعى, و بتتعامل على أساس ان مش مهم تحضر كل حاجة (خاصة طلاب كليات النظرية , على عكس الكليات العملية اللى الحضور تقريبا عندهم شبه اجبارى) فياريت تراجع نفسك. أحضر كل المحاضرات لو تقدر و اكتبها و خد ملاحظات عشان تلت حاجات: أولا, تفضل فاكر الكلام اللى انت حضرته و تبقى استفدت بالمحاضرة و ثانيا, عشان متحتاجش أخر السنة تدور على ورق و تصور المحاضرات و تلاقى حاجات ناقصة و تدخل نفسك متاهة ملهاش لازمة و ثالثا, الحضور ممكن يخليك تاخد درجات اعمال السنة و تسلم الابحاث و تحل الامتحانات و تعمل الحاجات اللى ممكن تزود درجاتك .
طبيعى انك هتفوت محاضرات عشان حاجات هتكون فعلا مهمة , بس دايما اتعامل مع قرار الغياب ده على انه قرار صعب و مش بيتاخد الا فى الضرورة القصوى.
6-متضغطش نفسك
الضغط ممكن يبوظ الموازنة فى ثانية. حارب الضغط بكل أنواعه. يعنى دايما حافظ على ترتيب مواعيدك عشان المواعيد متدخلش فى بعض و تضفطك, متدخلش فى كذا حاجة مختلفة مع بعض و تلاقى نفسك مش عارف توفق و ده يسببلك ضغط نفسي , أبعد عن الناس اللي بتحبطك و تقلل منك. أيا كان اللي بيسببلك الضغط , أبعد عنه.
7-اهتم بأكلك
احرص دايما تأكل أكل صحى اللي يمدك بالطاقة و ينمى ذكائك. و ابعد عن الماكولات السريعة اللى ممكن تضرك أكتر ما تفيدك , على سبيل المثال ممكن تزودلك وزنك و ده يخلي جسمك يتقل فتقل حركته و طاقته. أعرف إن صحتك البدنية بتأثر بشكل كبير عل صحتك النفسية. و الموازنة بين الدراسة و الحياة الاجتماعية أكيد محتاجة نفسية سليمة و عقل منظم و بال رايق.
8-أهتم بنومك
مش بس الأكل , كمان النوم عشان “العقل السليم فى الجسم السليم” ريّح جسمك و اديله حقه من الراحة. عدد ساعات النوم الكافية هتساعدك تواصل شغلك بنفس الكفاءة , هتحسن حالتك النفسية , و تنظملك يومك. لما تنام بدرى و تصحى بدرى و تاخد كفايتك من النوم , هتلاقيك صاحى فايق , مستعد و متحمس انك تبدأ يومك الجديد و قادر تشتغل فيه بكل طاقتك.
9-أعمل وقت لنفسك
مينفعش تفضل تذاكر طول الوقت , و مينفعش تلعب طول الوقت و مينفعش تفضل تنزل كل يوم و كل يوم فى حاجة شكل. لازم و أنت بتنظم أهدافك و ترتب أولوياتك, تعمل أوقات راحة و وقت لنفسك. وقت تعمل فيه اللى انت عايزه , حتى لو اللى انت عايزه ده حبة نوم زيادة , او انك تعد لوحدك مثلا مش شرط يكون خروجة او اى حاجة من اللى الناس التانية شايفنها مفهوم للراحة أو الاستجمام. المهم يبقى عندك وقت ليك انت و مريحك انت و “بتفصل” فيه من كل ارتباطتك و التزماتك و تكون فيه بكامل حرييتك. و ده هيساعدك جدا انك متضغطش نفسك على فكرة.
