بتحب الفيس بوك، طيب اسمع يا سيدى
نجيب الحكاية من الاول، لما بتعمل بروفايل على الفيس بيتطلب منك توافق على شروط العضوية، اللى هيه عبارة عن ٩٣٠٠ كلمة، قد الدستور الامريكى مرتين, ابقى قابلنى لو قريتهم
بعد ما بتعمل البروفايل بيتطلب منك تختار من ٥٠ خطة مختلفة للخصوصية، جواها ١٧٠ اختيار مختلف
اذا افترضنا انك صبور جدا و اخترت فعلا اكتر خطة بتحافظ على خصوصيتك و بتبعد عنك المتطفلين فالخبر الجميل ان مجرد ما الفيس بوك يغير حاجة فى الخصوصية بتاعته فبيحولك بصورة اوتوماتيك لخطة الخصوصية الاصلية، اللى هيه من غير خصوصية اصلا، يعنى كل حاجة فى بروفايلك بتبقى على عينك يا تاجر
ما اقصدش ان اصحابك هيشوفوا حاجاتك الخاصة، لو وقفت على كده تبقى سهلة، انا اقصد حاجة اكبر بكتير و هى انك كده بتدى الفيس الحق يعمل اللى عايزه فى بروفايلك
هما ليه بيعملوا كده؟
اكيد بتسأل نفسك السؤال ده و بتقول انك اقل من انهم يهتموا بخصائص حياتك
طيب ركز معايا ياسيدى، انتا بالنسبة لفيس بوك عبارة عن سلعة، بيبيعوك زى اى منتج لشركات التسويق و الاعلانات، علشان الشركات دى تاخد حضرتك و تعمل عليك ابحاث و تطلع بنتايج تعرف منها تنزل السوق بايه
الفيس بوك بيبع بروفايل الواحد مننا بتمانين دولار للشركة اللى عايزاه
و قبل ما تتكلم، ما تنساش انك مضيت بالموافقةعلى كل ده
نسيت اقول لك ان اى موقع بتدخله و بيكون فيه علامة الفيس بوك الصغيرة اللى ممكن تخليك تدخل الموقع ده ببروفايل الفيس، كل الداتا اللى بتبعتها للموقع ده موجودة عند الفيس بوك و بيبقى عارف انتا دخلت الموقع ده امتى و عملت فيه ايه بالضبط، حتى لو ما كنتش عامل تسجيل دخول
فيس بوك بقى اشترى شركة معفنة فيها ١٣ موظف اسمها انستجرام، و دفع فيها مليار دولار
يا ترى مارك دفع مليار دولار فى حاجة معفنة زى دى ليه،
ببساطة، سيطرة الفيس على انستجرام فتحت له باب جديد للسيطرة على حضرتك و حياتك اكتر من الاول، فبدل ما يبقى مسيطر على معلوماتك و شخصيتك بس، بقى مسيطر كمان عل كل صورك و له الحق فى استخدامها، هوه انا نسيت اقول لك ولا ايه
اصل انتا اول ما بتعمل بروفايل على انستجرام بيبقى ليه الحق يعمل اللى عايزه بالصور بتاعتك، و كله بالقانون
يعنى صورة البيبى الجديد اللى ربنا رزقك بيه ونزلت صورته على انستجرام علشان عاجباك، ما تستبعدش انك تلاقى نفس الصورة بعد كام شهر على علبة سيريلاك، اذا كان ابنك عسول اوى و يستاهل، من غير اذنك و من غير ما تاخد ولا شلن
او صورة غروب الشمس اللى صورتها بكاميرتك الاتش دى فى رحلة تركيا ممكن تلاقيها بقت اللوجو الرسمى لاكبر شركة سياحة فى تركيا، برضه من غير اذنك و من غير ما تاخد ولا شلن
علشان كده احنا المستخدمين لمواقع التواصل الاجتماعى دخلنا التاريخ بكوننا ا largest unpaid workforce in history اكبر عمالة لا تتقاضى اجر فى التاريخ
طبعا بعد ده كله مش لازم اقول لك ان كل رسايل الانبوكس بينك و بين خطيبتك محفوظة عند الفيس بوك فى مكان امن، و اطمئن انهم مش هيتخلصوا منها قريب خالص، حتى لو كانت اول حاجة تعملها بعد ما تخلص البوست ده انك تمسح كل الرسايل و الصور و تعمل قفل للاكونت بتاعك، الناس دى ما بتمسحش حاجة، و اللى اتكسر ممكن يتدغدغ، انتا كل اللى بتعمله انك بتمسح الداتا من عندك مش اكتر
نسيت اقول لك انك لو عملت بروفايل جديد من مكان جديد باسم جديد، فهما هيعرفوا انك انتا اللى عامل البروفايل ده برضه و هيحطوا كل داتا بتخرج منه فى نفس الفولدر اللى فيه الداتا بتاعت بروفايلك القديم
كل اللى هيحتاجوه علشان يعرفوك ان ابن خالتك يحطك فى قايمة العيلة عنده او اخوك يقول لك كل سنة و انتا طيب فى عيد ميلادك او واحد صاحبك يعمل لك تاج فى صورة حتى لو انتا مانع اصحابك يعملوا لك تاج فالصورة وصلت للفيس و عرف انك انتا صاحب الصورة دى، من الاخر ماتحاولش تهرب
مش محتاج اقول لك ان فيه قضايا بالهبل مرفوعة ضد الفيس بوك بسبب انتهاك الخصوصية، و الفيس ما عندوش مشكلة فى القضايا دى، هوه شايف ان العشرين مليون دولار اللى بيدفعم تعويضات فى الفضية الواحدة ولا حاجة جنب المكاسب اللى بيوصل لها، و فى الاول و الاخر هوه هيلاقى طريقة جديدة يعريك بيها
طبعا كل واحد هيعمل لايك او شير للبوست ده، لازم يعرف ان عمو مارك عرف انك عرفت هوه بيعمل ايه، الستة مليار لايك اللى بتعملهم البشرية فى اليوم كلهم متسجلين و متشالين فى الحفظ و الصون
ده بالنسبة للفيس بوك الازرق الشرير، طيب ايه القصة مع جوجل؟
اكيد طبعا جوجل دول ناس محترمة مللهاش فى اللف و الدوران، ده حتى شعاراتها تحسسك بالدفء و المشاعر كده، و كل يوم تلاقيهم بينزلوا على صفحتهم الرئيسية احتفال بشخصية اتولدت فى اليوم ده حتى لو الشخصية دى ضد امريكا و سياساتها، يا راجل دول فى عيد ميلادى بيحطوا لى تورتة على صفحتهم الرئيسية " هما عرفوا عيد ميلادى ازاى صحيح؟؟؟" ، ولا كمان اندرويد الكائن الاخضر اللذيذ ده، و اصداراته كل اسمائها جميلة ، لوليبوب و كيت كات، حاجة اجنص خالص
جوجل ده بقى تقدر تقول عليه ابليس بتاع الانترنت، الشيطان الكبير، الشركة دى بتتعمد تظهر لك كل منتجاتها بالمظهر البرئ المغفل، كل ده علشان يكسبوا ثقتك و يخلوك تقبل هديتهم بايد، و هما بيطعنوك فى ضهرك بالايد التانية، حاجة كده زى حصان طروادة بالضبط
ماانساش زيارتى اليتيمة للdeep web لما حاولت ادخل اليوتيوب و الكوكيز مقفولة فقال لى احنا علشان مصلحتك بنمنعك تدخل الموقع من غير كوكيز لاننا بنجمع معلومات عنك تساعدنا نخدمك بشكل افضل " اه يا ولاد ال..."
فى اليوم الواحد، جوجل بتجمع ٦٢ بيتا بايت من الداتا بتاعة عملائها، " البيتا بايت مليون جيجا بايت, ذاكرة الانسان تقدر باتنين بيتا بايت كأقصى تقدير"
الداتا اللى بيجمعوها فى اليوم الواحد لو اتكتبت فى كتب و اترصت فوق بعض هتملى نص المسافة بيننا و بين القمر
و اوعى تنسى، انتا مضيت على الكلام ده لما وافقت على شروط الخصوصية
و اوعى تنسى كمان، الناس دى مش بتمسح حاجة ابدا
يعنى تاريخ الpornography بتاعك كله يا معلم فى الحفظ و الصون
طبعا دلوقتى مش هتتفاجئ لو قلت لك ان جوجل بتطلع على كل رسايلك فى الانبوكس، و كل الداتا بتاعتك فى جوجل درايف، و اى اتصال بتعمله من خلالهم بيتسجل و بيشيلوه لحد ما حد يحتاجه، بالاضافة طبعا لكل اللى بيعمله الفيس بوك، فجوجل بتعمل نفس الحاجات بالضبط و اكتر شوية
دول وصلت بيهم البجاحة ان حضرتك لو معاك ايميل مش تبع جوجل و فتحت محادثة مع مستخدم لجوجل فكل اللى بيحصل فى المحادثة دى بيبقى عندهم رغم انك اصلا مش جزء من جوجل بس غلطت و تواصلت معاهم،جوجل بتتقاضى قدام المحكمة الفيدرالية على الموضوع ده دلوقتى بس ده مش موضوعنا
اما لو كنت راجل مبدع و مؤلف او صاحب اختراعات، فالحتة الجاية دى تهمك اوى
اى ملف بترفعه على ملفات جوجل Google docs كده يا ريس مبروك عليك، انتا فقدت حقوق نشر الملفات دى و اصبحت ملك لجوجل
يعنى لو افترضنا ان ج.ك.رولينج كانت كتبت روايات هارى بوتر على جوجل بدل ما كتبتها على مايكروسوفت وورد
كان زمان جوجل دلوقتى من حقه يبيع الروايات دى و يديها لهوليوود تعملها فيلم و كان زمان ال١٥ مليار دولار اللى كسبتهم ج.ك.رولينج من هارى بوتر كلهم فى جيب عمو جوجل، ولو عايز تشتكى، اوعى تنسى انك ماضى بنفسك و قلت انك قريت بنود العقد كمان
طبعا تخيل لو الحكومات استخدمت المعلومات دى لملاحقة معارضيها، و تخيل برضه لو العكس هوه اللى حصل " خرايط جوجل عارفة انتا فين طول ال٢٤ ساعة طول ما موبايلك معاك حتى لو قافل الGps" " حاسس ان سيناريو رواية ١٩٨٤ بيتكرر بالضبط"
طيب تخيل لو هاكر شاطر شوية عرف يوصل لحاجات زى دى و جاب الداتا بتاعتك كلها، حصلت قريب فى ممثلات هوليوود و اتنشرت صورهم الخاصة جدا من هاكر اسمه the fappenning
طبعا الحمد لله ان انا و انتا نكرة محدش يهمه انه يسرق صورنا و رسايلنا الشخصية، بس تخيل لو حد شاف اننا مهمين لدرجةانه دعبس ورانا و شاف المستخبى، و مش بعيد ربنا يكرم حضرتك فى المستقبل و تبقى شخصية مشهورة و ييجى حد يبتزك بملفاتك و يهددك انه يفضحك
فاكرين موضوع تعرى البيوت، لما ناس قعدت تقول ان نشر تفاصيل حياتك الشخصية ممكن يخليك تتحسد، دلوقتى الموضوع مش موضوع حسد و بس
الموضوع ببساطة ان فيه ناس متخصصة فى انها تخش على بروفايلك و تراقب نشاطاتك على النت علشان تعرف انتا امتى بالضبط هتاخد الاولاد و تغيب اسبوع عن البيت علشان تزور خالتك فى دمنهور علشان يعرفوا يسرقوا بيتك براحتهم من غير دوشة
الموضوع اكبر منى و منك
انا شخصيا ماكنتش متخيل ان الناس دى بتعمل كده، و لو حد كان قال لى البوقين دول من اسبوع كنت هاقول عليه عبيط
انا من شهر فات كنت ناوى اقطع علاقتى بكل شئ غير الكترونى و انقل حياتى كلها اونلاين، ملفاتى و مذاكرتى و صور العيلة، و كل حاجة، بس طبعا دلوقتى غيرت رأيى خالص
الموضوع كبير جدا، و ربنا هو الحافظ
بس كل اللى عايز اطلبه من حضرتك دلوقتى على الاقل، بلاش كل صورك تخليها على انستجرام
بلاش كل ما تروح مكان تعمل تاج للناس اللى معاك و تتصوروا و تقولوا انتوا فين بالضبط
بلاش يبقى لك اى صور خاصة مش بحجابك سواء مع صاحباتك او قرايبك ولا حتى على الكمبيوتر بتاعك، ولا كمان فى محادثات الويب كام
بلاش رسايل الانبوكس يبقى فيها اى شئ ممكن يبقى خطر عليك "كلامى هنا لناس عارفة نفسها كويس"
اذا كنت-زيى بالضبط- مرعوب بعد ما قريت البوست ده، فافتكر ان فيه اتنين على كتفك اليمين و الشمال بيلازموك ٢٤ ساعة، هما الوحيدين بعد ربنا اللى عارفين عنك حاجات اكتر من مارك و جوجل و اى حد على الكوكب ما يعرفوا عنك،و افتكر ان الحاجات دى هييجى يوم وتتعرض على رؤوس الاشهاد
مقال لـ طارق رشدي
