عايز تبقي Freelancer ؟

يبقي لازم تعرف المخاطر قبل ما تخش في الموضوع

** الفري لانس ممكن دخله يبقي أضعاف اللي ممكن تاخده كراتب في أي شركة بس في مشاكل لو معالجتهاش مش هتلاقي تاكل ..

** هدف البوست انه يوضحلك المشاكل اللي هتقع فيها فيها بحيث انك تعاجلها قبل ما تبدأ أو تعيد التفكير في قرارك بأنك تشتغل فري لانسر ..
----------------------------------------------------
1- ادارة الوقت :
في الشغل التقليدي انت بتشتغل طول الشهر و بيجيلك الراتب سواء كان في مشاريع أو لأ وانت مبتشتغلش دماغك بادارة الوقت أوي لكن
في الفري لانس الوضع مختلف تماما لان الوقت = فلوس .. كل وقت بتضيعه بيطير من دخلك كتير .. فلو مش هتقدر تدير وقتك كويس يبقي هتخسر كتير أوي ..
فلازم قبل ما تاخد بروجكت تدرسه كويسه + تدرس الوقت التقريبي اللي هياخده منك + حدد السعر بناءا علي كده وتلتزم في الوقت علشان العميل شبه مستحيل انه يزودلك علي السعر ..
راقب وقتك و ادي نفسك تقييم و شوف اللي بيضيع وقتك واتجنبه بحيث ما يتكررش في المستقبل

----------------------------------------------------

2- تحديد تفاصيل المشروع :
العميل شخص مش فاهم + انه بيطلب طول الوقت تعديلات ما بتخلصش فلازم تكون محدد معاه تفاصيل المشروع بالكامل قبل ما تبدأ و تتأكد ان الرؤية وصلالك تماما او بنسبة كبيرة جدا زي ما هو عايزها .. و تكون متفق معاه علي ان التعديلات الجذرية او الاضافات هتكون بمقابل و ما تتنازلش عن كده لان ده حقك .. وما تجيش علي نفسك طول الوقت وتعمل حاجات بدون مقابل لانك مش عبد والرزق بتاع ربنا وعلشان ما توصلش لمرحلة ان المشروع ما بيخلص و ومفيش مبلغ زيادة في المقابل و هتوصل لمرحلة انك هتتقفل ومش هتكمل المشروع ..

----------------------------------------------------

3- حياتك الشخصية :
لو بتشتغل في شركة علاقتك بالشغل بتنتهي بانتهاء مواعيد العمل ..
في الفري لانس الموضوع مختلف انت بتشتغل بمزاجك في أي وقت .. بس خد بالك كويس ان علي أد ما دي حاجة مرنة الا انها نقطة ضعف ممكن تدمر حياتك ..
لو هتشتغل فري لانس لازم تحدد لنفسك وقت تبدأ فيه شغل و وقت تنتهي فيه من الشغل .. و بعد الوقت المحدد ده ترجع لحياتك الشخصية و ترفه عن نفسك .. يعني ما تتحولش عبد للشغل و ليل نهار تشتغل علشان ما يجيش عليك وقت نفسك تتسد و ما تشتغلش خالص ..

----------------------------------------------------

4- مكان الشغل :
مش معني انك فري لانسر انك تشتغل في أي مكان .. لانك لو عملت كده هتلاقيك بتتشتت أو تلاقي حد بيقطع تركيزك .. فلازم يكون ليك مكان محدد بتشتغل فيه و تجبر كل اللي حواليك انهم يلتزموا بالمواعيد اللي بتشتغل فيها محدش يزعجك او يتعاملوا معاك كأنك مش موجود ..
فتحاول يكون مكان الشغل هادي و منظم و بسيط و مفيهوش حاجة تشتت تركيزك .. و ممكن في بعض الاوقات تضطر يكون مكان الشغل منفصل خالص عن البيت..

----------------------------------------------------

5-النصب :
مفيش حاجة اسمها اشتغل و لو الشغل عجبني هحولك مقدم .. مفيش الكلام ده خالص
لازم تاخد عربون قبل ما تبدأ شغل و ما تخافش الرزق لو مكتوبلك هيجيلك .. ما تحطش روحك في ايد واحد بيجرب فيك و ممكن في لحظة يقولك انا غيرت رأي ومش متحمس للفكرة

----------------------------------------------------

6- طور من نفسك :
لازم تطور من نفسك باستمرار و تتعلم كل جديد علشان تكون جاهز لاي بروجكت يتطلب منك و لان احتياجات العملاء كتير جدا فلازم تواكب كل جديد ..

----------------------------------------------------

7- نوع مصادر دخلك :
كفري لانسر لو لاقدر الله تعبت أو وقفت شغل لمدة دخلك هيتأثر جدا .. فلازم يكون ليك أكتر من مصدر للدخل .. ممكن لو انت مبرمج تعمل أكتر من منتج و يكونوا بيتباعوا جنب شغل البرمجة اللي بيطلب منك ..

----------------------------------------------------

8- تسويق نفسك :
ايه الفايدة تكون أفضل شخص في مجالك و محدش يعرفك ؟؟
ده أكبر مشكلة هتقابلها في البداية كفري لانسر .. فلازم تسوق نفسك كويس و تسوق شغلك علشان يتطلب منك مشاريع .. وممكن في البداية تنزل بعض أعمال مجانية بحيث الناس تعرفك و تستغل السوشيال كويس في تسويق نفسك ..

----------------------------------------------------

9- الترفيه :
ودي أهم نقطة .. لازم يكون ليك أيام أجازة ما بتعملش فيها اي حاجة غير انك تفصل عن جو الشغل و ترفه عن نفسك لان ده اللي هيعيدلك النشاط تاني علشان تكمل شغل وانت مبسوط


كتبه : أحمد صيام