كلنا بنعاني من التشتت... وميحللناش التأمل إلا واحنا بنذاكر - ايه الحل

بما إن الدراسة خلاص بدأت بقالها فترة والحمد لله

 .. حابب أتكلم عن حاجة مهمة جدًا إسمها: The Pomodoro Technique ..
كلنا بنعاني من التشتت... وميحللناش التأمل إلا واحنا بنذاكر ..
وبنبقى Easily Distracted .. بأي حاجه حوالينا..
تبص كل شوية على الموبايل.. تفتح الفيس وتعمل ريفريش ومفيش حاجة جديدة.. تتأمل المروحة .. تستنى حد ينادي عليك عشان تقوم..
أو تقوم كل شوية لحد التلاجة.. تفتح التلاجة.. تقفل التلاجة..
وده بيحصل نتيجة إن جوا مخك في أعصاب مسئولة عن الألم.. كل ما تقعد على مذاكرة أو حاجة تخلصها وانت مش طايقها .. أو خليني أقول مش بتعشقها.. هتقوم الخلايا دي شغالة والألم جوا دماغك يبدأ..
لا إراديًا يقوم عقلك يعمل إيه؟
عاوز يلغي الألم -الوهمي- الحاصل نتيجة المذاكرة ده.. يقوم يشتتك لأي حاجه تانية عشان يمنع الألم ده..
-
ومن هنا جاءت هذه الفكرة العبقرية لشخص اسمه: Francesco Cirillo .. عملها بداية الـ 1980 ..
نخش في التفاصيل..
الطريقة دي عشان تقدر تنجز وتشتغل وتخلص اللي وراك بدون ملل وتشتيت..
طيب هتعمل إيه؟؟
--
1- هتشوف الحاجة اللي عاوز تخلصها .. ولنفترض محاضرة ما .. تخلص في ساعة.. هتبدأ تقسم الساعة على 2 Pomodoro .. كل Pomodoro بيبقى 25 دقيقة.. وبعده 5 دقايق Break.
يعني من الآخر= هتشوف ايه اللي عاوز تخلصه وياخد كام Pomodoro معاك ..
والـ Pomodoro الواحد 25 دقيقة.
2- هتشيل أي تشتيت بيشتتك 
اقفل على نفسك.. شيل كابل النت أو الراوتر.. اقفل الموبايل.. لمدة 25 دقيقة بس وهترجع تاني.
3- Process Not Product
احنا قلنا هتظبط التايمر على 25 دقيقة لإن ده وقت كافي جدًا لمخك إنه يشتغل المدة دي ويفضل مركز من غير ما يتضايق أو يهنج منك ..
-- وأهم شئ --
إنك تركز على العملية.. مش على المنتج.. يعني متقلش انا لازم اخلص الـ 6 صفحات دول في الـ Pomodoro ده .. لأ .. انت خش فيهم وسيب نفسك.. عيش مع الـ 6 صفحات.. مش مهم يخلصوا.. المهم إن انت شغال.. مش مهم تخلص .. المهم تنجز .. ومتحطش أبدًا قدامك إنك لازم تخلص.. سيب نفسك ع الآخر ..
4- بعد كل 25 دقيقة .. خد بريك.. 5 دقايق بس.. وبعد كل "أربعة" Pomodoro .. خد بريك من ربع لنص ساعة.. البريك ده مكافأة لنفسك.. شجع نفسك.. حس إنك خلصت حاجة! وأنجزت! ..
ياااه.. قعدت 25 دقيقة من غير ما اتشتت.. 
-
طب هعمل إيه في البريك (سواء الصغير أو الكبير)؟
انزل جيب حاجه من تحت.. العب ضغط.. افتح الفيس.. شوف الموبايل.. تأمل المروحة 
قوم اعمل نسكافيه .. قهوة.. قرفة باللبن.. نعناع.. شوفلك فيديو من Minutephysics أو ..
VSAUCE .. أو شوف حلقة Hunter أو Naruto أو Death Note ..
المهم.. اعمل أي حاجه بتحبها ..
وممكن تقرأ المقال ده: 5 Desk Exercises for Your Busy Office Life

5- الموضوع ينفع لأي مهمة أيًا كانت.. مش لازم مذاكرة ودراسة بس..
6- إدعيلي بعد ما تجرب 
وشارك الفكرة مع زمايلك
--
- في Application للـ Pomodoro معمول على أندرويد.. خش اظبط تايمر وعيش حياتك من هنا
- لو مفهمتش حاجة من اللي أنا قلته.. شوف الفيديو ده بيشرح الموضوع
(ممكن تجرب تعمل الموضوع ده وانت قاعد ف المحاضرة إنت وصحابك بدل ما إنتم قاعدين تتكلموا)
(حاول خليه تحدي ليك .. وحب اللي إنت بتعمله)