تخيل واحد بيحاول يكتب رسالة على ورقة بيضا .. وفي أول سطر غلط في كلمة .. لكنه محبش يعدلها في نفس الورقة لأن شكلها مش هيكون مثالي .. فقرر يبدأ في ورقة جديدة
لكن بعد كام سطر غلط غلطة جديدة .. فقرر يبدأ من الأول وهكذا
الكثير من الناس يتخيل أن الوصول للنجاح لا يتم إلا من خلال تنفيذ مثالي لخطة مثالية.. وده مش صحيح بالمرة
وبالتالي لما الشخص منهم يبدأ في أمر ما ويعجز عن الالتزام في أوله .. يحبط ويتوقف لأن فرصة التنفيذ المثالي للخطة ضاعت عليه .. ولازم يبدأ من الأول تاني
وإن كانت الورقة الجديدة حاجة رخيصة ومتوفرة بكثرة .. سنين العمر غالية ومحدودة .. ولو في كل مرة قررت تنتظر بداية صفحة جديدة من عمرك عشان تكمل .. فأخشى أن العمر هيعدي قبل ما تكمل
الناس بتحب البدايات الجديدة لأنها بتتخيل إنها هتقدر مع البداية الجديدة تلتزم من غير ضعف ومن غير فشل ومن غير أخطاء .. وهيقدروا يلتزموا بالخطة بالشكل المثالي اللي بيحلموا بيه فيوصلوا لأهدافهم
لو قررت أن تعمل كل يوم ساعتين على تطوير نفسك في مهارة معينة .. فلم تستطع أن تلتزم بأكثر من نصف ساعة فقط .. فبلاش تقرر التوقف تماما
لو قررت تعمل دايت ولخبطت بعد كام يوم مش لازم تبوظ النظام وتتوقف.. لحد ما تتحمس تاني وتبدأ من الاول
بلاش يسيطر عليك فكرة إما كل شيء .. أو لا شيء على الإطلاق
دي فكرة شيطانية استبدلها بــ مالا يدرك كله ..لا يترك كله .. واغلط وقصر .. وكمل عادي
منقول
