إيه هو الطموح السلبي أو الطموح القاتل وازاى تتغلب عليه؟
كتبت/سهيلة اشرف العمروسى
الطموح القاتل، هو الطموح بلا إمكانيات، أو الطموح من غير مايكون عندك أدوات عشان تحققه، زى مثلا لو عاوز تبقى دكتور وانت مش بتذاكر
انت كدا بتخلط بين الوهم والطموح، عشان تحقق طموحك لازم تاخد خطوات فعليه على أرض الواقع.
تعريف الطموح عكس تعريف الطموح السلبي، الطموح معناه ان عندك الحافز والرغبة عشان توصل لهدف معين ، وبتسعى للوصول ليه بكل الطرق الممكنة، مش قاعد سرحان فى عالم الخيال وأحلام اليقظة.
تعال أقولك عزيزى القارئ ازاى تساعد نفسك على تحقيق طموحك ؟
ببساطة انت لازم تنتقل من طموحك القاتل إلى طموحك الإيجابي، وإعرف ان مفيش حاجه مستحيله فى الحياه، طالما عندك الإرادة، ودلوقتى هقولك ازاى تحقق دا.
١- لا تؤجل عمل اليوم إلى الغد
اللى عندهم طموح قاتل، بتلاقيهم بيأجلوا كل حاجه لوقت تانى، لكن اللى عنده طموح حقيقى مش بيفكر فى تأجيل أي حاجه مهما كانت صغيره، ودا بيخلى المسئوليات اللى عليهم متتراكمش وبالتالى بينجزوها اول بأول.
٢-الالتزام
اوعى تتخلي عن طموحك، حتى لو الموضوع كان صعب، وكل ماتواجه تحدى حارب عشانه، وبلاش تستسلم لاى حاجه صعبه تواجهك.
٣-حدد أهدافك
اسأل نفسك، انا عايز ايه وليه؟
وازاى هحققه، الإجابة على الأسئلة دى هتساعدك فى طموحك أكتر، وهتعرف انت قد إيه متمسك بيه وحابه ، وبكدا انت هتبعد عن الطموح السلبي، وبلاش تختار طموح عشان حد تانى اختاره لأنك هتفشل فيه. "القاعدة الذهبية للنجاح في أي أمرٍ أن تحبّه أولاً"
٤-لا تفقد الأمل
لو فشلت في اختبار او امتحان معين، وحسيت أن تحقيق طموحك على المحك، قبل ماتتشائم فكر شويه : ليه انا فشلت ؟
هل عشان مذاكرتش، او عشان مبحبش المذاكرة؟ او ذاكرت بس ربنا موفقنيش؟ لو كانت الاجابه أنك مذاكرتش كويس، يبقى خلينى أحذرك تانى من الطموح السلبي، ولو كانت الاجابه ان ربنا موفقكش المره دى، فبلاش تفقد الأمل، هتنجح المره الجاية.
٥-كُن صبوراً
انت مش هتحقق طموحك بين ليلة وضحاها، لو كان طموحك انك تكون صحفى ، هتحتاج للدراسة لعدة سنوات، وبعدين تدخل في سوق العمل، وبعدها تبذل جهد كبير تحقق بيه الشهرة والنّجاح الى عاوزه، أنك تكون صبور ف دا معناه أنك تشتغل وتدرس بجد وتجتهد وتصبر لحد ماتوصل للى انت عاوزه ، اللى عندهم طموح قاتل مش هيستنوا كتير وهيهربوا لأحلامهم وأحاديثهم عشان يحققوا اللى مقدروش يحققوه فى الواقع.
بالتوفيق ي عزيزى، وأراك في القمة.
